كيف تصطادين عريسا

الاميرات العزيزات اليكم بعض التوجيهات فى كيفية (اصطياد العريس) باستخدام الأساليب الحديثة غير المكلفة وذات الأثرالفعال...ماعليك الا باتباع هذه التوجيهات والنصائح وحينها سنسمع بك قريبا ( عروسة لقطة )...
أول خطوة ركِّزي على النسوان العجايز.. وبخاصة (أم العريس) العليو النظر....
ثانيا...خليكى لاصقه جنب أمك وبطِّلي عوارة وجرى ورا البنات صحباتك (شِن سوِّيتي بالخفة والهبالة يالفالحة؟!!)
ثالثا.. لمَّ تكوني ماشَّة راسك الكبير دا تختيو بين كتافينك ...وأبداً ما ترفعى لي فوق عشان يقولو مؤدَّبة وما متقندفة وبطِّلي فلهمتك الما جابت ليك غير البلاوي.....
رابعا كلمة( خالتو وعمتو ) دي خليها طوالي فوق لسانك وخاصة لي (أم العريس المنتظر) عشان تحس بالتميز من بقية القاعدات معاها (ما في مانع تنادى واحدة تانية بخالتك الدنيا ما معروفة يمكن الخطة ما تنجح وفي الحالة دي لساتكك ما تطير وبكون عندك بديل جاهز.. وخلي بالك العمر جاري )....
خامسا... أخوانك الصغار أجرى وراهم واعملي انك مهتمة بيهم كأنك أمهم عشان (أم العريس) تقول عليك إنك حنينه على أولادك (ربنا يخلف عليك)...!
سادسا.... لو مديتي إيدك لي شي (اريتا بالكسر) اتوجَّعى واتنهَّدي (بس براحة كدا.. لأنو صوتك شين) خلى أمك تقول يديها العافية انا أقوليها ما تنضِّفى الشارع إلا هي كاتلاها النضافة (ولو جينا للجد تلاقيك اوضتك ما قادرة عليها والصراصير سيرة عرس بي دلاليكا.!!!)
سابعا....إذا النسوان الكبار ديل اتكلمو عن أي عرس (اكتمي نفسك) لغاية ما خدودك يحمِّرَن عشان يقولو البت خجلانة (وأعملي حسابك ما تكتمي نفسك للنهاية بعدين تروحي فيها وتودينا فى داهية..!!).
مهما كان الموضوع حماسي خليكي راااااسية وتقيلة وبطِّلي خفَّة وما تنحشرى فيو (التِحشِّر دا بتجيب أجل الخطة كلها وطيارتك ح تقوم..!!).
ثامنا...شعيراتك ديل خليهن مفرودات أوعك من الطاير والمنكوش (النسوان العجايز ديل جنهن وجن الشعر المنكوش..!!!).....
تاسعا... ام العريس ( العليهو العين) لوقالت أي حاجة أكان سياسة ولا اقتصاد إن كان مسيخ وما منطقي ولا أفقي (حتى لو قالت أمبارح بوش كان فاطر معانا) قولي بي حُسن نية وبراءة وليه يا خالتي ما كلمتينا نجي نساعدكم؟!!
عاشرا... إي عرس قاعدة فيو (ام العريس) أوعك من النطيط والرقيص.. اهمدي واتلمى وقولي بطريقة تسمعا (إنو الرقيص دا عيب)..!!
. لو جات سيرة السوق خلى امك (ربنا يصبرا عليكي) تقول بناتى أصلن ما بمشن السوق وأي حاجه بجيبا ليهن ابوهن (وتلاقيك حايمه السوق زى بتاع الترمس)..
اقفلى الموبايل اوخليهو صامت عشان ام الكوتش ماتقول البت جنها تلفونات(ودى حقيقه اصلا ).. واحتمال واااارد
بينك وبين نفسك ممكن تقولي إنو العجوز (أم صاحبنا) خاتا عينا على وحده تانية والبتسوي فوقو إنتي دا ح يروح شمار فى مرقه ساي!!! أوعك تصدقي الأوهام دي.. ركزي في تنفيذ الخطة والحاجة ح تقع يعني ح تقع وح تجيبي كثافتا لا محالة بي حركاتك دي..!!
الله يوفقك وما تنسينا من حلاوة العرس.. بس حسك عينك تقولى لى زول منو العلمك الكلام دا.. الحُسَّاد كُتااااااااار.. تجي وحده من اياهم تستعمل نفس الخطه ولساتكك تطير وتمشي بي عجل حديد بعد اك.!
تحذييييييييير
ابعدي من العجايز المتعلمات البلبسن الجزمه لون الشنطه الماشا مع الفستان.. ديل مصايب ودايرين خطط جهنمية أنا ما بقدر عليها..!
نصيحه
صحباتك ح يلاحظن التغييرات الحاصلة ليك اوووعك لسانك دا أبلعي وسرك خلي فى بير بطنك وإلا لساتكك ح تطير قبل العريس.